يا بنات اللى عيزة تتجوز تدخل هنا بسرعة

النهاردة جبتلكم معايا خطة فعالة عشان تقفشي عريس و تتجوزيه المهم نبدأ
اول حاجة تحددي الست العجوزة الي حاطة عينك علي ابنها وبعدين نفذي التالي:

1- سيبك من صحابك والشلة خاااالص خليكي لازقة لمامتك كام شهر لغاية العملية ماتخلص.

2- لو ماشية في شارع او اي مكان علي طول خلي راسك بين كتافك وماترفعيهاش
خالص ( ابقي حطي في شنطتك ابو فاس عشان كتافك لو وجعتك ولا حاجة)

3- كلمة نينة دي ماتفارقش لسانك خصوصا لأم العريس عشان تحس بنوع من التميز عن باقي الستات...
ملاحظة هاااامة: مافيش مانع تقولي لست كمان يا نينة عشان لو الخطة فشلت مع الست الأولانية تنجح مع التانية الاحتياط واجب يابنات

4- اول ما ماما تبدأ الكلام غزيها بكوعك عشان تدخلك في الحوار حتي لو
مالكيش لازمة اعتمادا علي المثل الي بيقول كتر الدق يفك اللحام عارفة انه
مالوش لازمة بس مالاقيتش غيره( خلي بالك وانتي بتغزيها خفي كوعك لاتاخدي
علقة محترمة ادام الست ويطير العريس)

5- لو ليكي اخوات صغيرين او اي قرايب صغيرين خليكي معاهم لاعبيهم وخليكي
وراهم فين مايروحو عشان الست تاخد عنك فكرة انك حريصة عالاولاد الصغيرين
يعني اولادك مستقبليا انشاء الله

6- كل ما ماما تاكل اكلة حلوة خليها تقول دي زي الي بنتي بتعملها تمام حتي لو الاكلة من مطعم صيني او مكسيكي

7- لو جيتي تمدي ايدك تقدمي حاجة للست ولا لمامتك اتألمي وخلي ماما تقول :
مش قلتلك ياحبيبتي ماتنضفيش حيطان البيت من برة . (ابقي نضفي غرفتك الاول
الي تقولو منفجر فيها قنبلة ذرية)

8- لو الستات اتكلمو عن الجواز اكتمي نفسك لغاااااااية ماتحمر خدودك عشان
يقولو : البنت بتكسف مالناش حق نتكلم جمبها. ( بس اوعي تكتمي نفسك كتير
احسن تروحي فيها و اروح انا السجن)

9- مهما كان موضوع الحوار ماتبديش رأيك فيه خليكي زي الخرسا لأن الحشرية هتجيب اجل الخطة.

10- شعرك افرديه ماتعمليهوش كيرلي ولا اي تسريحة عالموضة لأن الستات بيدورو علي الي شعرها ناعم

11- اذا الست ام العريس قالت رأيها سواء في موضوع سياسي او اقتصادي او
وطني وافقي عليه حتي لو كان رأيها بايخ ومالوش لازمة مثلا لو قالت : بوش
كان عندها امبارح بيشرب شاي مع الحاج قوليلها: طيب ليه يانينة ماقولتيلناش
كنا جينا ساعدناكي.

12- لو رحتي فرح اوعي ترقصي تعالي علي نفسك شوية معلش والزقي نفسك بأمير
في الكرسي بتاعك واعتبري ان الرقص عيب عشان الستات يقولو عليكي مؤدبة
وبتتكسفي

13- لو جت سيرة السوق وهي لازم هتيجي لان دي ملح الجلسات الحريمي خلي
مامتك تقول : بناتي مبيحبوش يروحو السوق او يعملو شوبينج باباهم هو
بيجيبلهم الحاجات الي عايزينها(ماتتخضيش ده بس كده وكده)

دلوقتي الست العجوزة هتكون وقعت في المصيدة
نيجي بقي للعريس

1- خليكي زي ماتفقنا في بيتك مافيش طلعات ولا خروجات ولا حتي تقفي عند
الباب ولما العريس يجي يشوقك خلي باباكي يقول: والله يابني انا هخليك
تشوفها بس من غير ماهي تعرف عشان تاخد راحتك وكمان تشوفها علي الطبيعة
وبكرة ماتقولش غشيناك( والله ي***ج لو تقدر تحط نانسي عجرم ولا اليسا مكان
بنتك وتوريهاله عشان يوافق كنت عمتلها )

2- قبل المعاد الي اتفق مع اهلك يجي فيه عشان يشوفك باسبوعين او اكتر
قضيها من كوافير لكوافير فرد شعر صبغة تنضيف بشرة منيكير بديكير
.....الخ.. مش هوصيكي

3- لما يجي العريس خلي باباكي يقعد معاكم عشان ميفضلش يبحلق ويتنح فيكي ويبان المستخبي علي رأي المثل " النظرة ذبحة"

4- في نهاية القعدة خلي الوالد يقول: معلش يابني البنت مالحقتش تظبط نفسها وشكلها ملخبط شوية( معلش ي***ج كدبة بيضا على المسكين )

في اللحظة دي العريس هينط علي باباكي ويبوسه لغااااااااية مايشفط مخه ويقولو الفرح امته ياعمي...

تحذير هااااااام: ابتعدي عن امهات الشباب المتعلمين والمثقفين اللي بيلبسو القميص نفس لون الجزمة دول بيحتاجو خطط بعيدة المدي.....